大家好！初次報到
我係Justin陳樂。某次機緣巧合去到 FUNGUITAR 認識左阿峰同哈利。喺佢地嘅介紹（毒）之下，第一次上去就買左支Furch Cedar Yellow。
之後好開心阿峰邀請我一齊做作品之餘，仲提議我寫呢個專欄。坦白講，自己為音樂執筆撰文唔多，通常只有偶爾嘅填詞；所以寫專欄一事，都算係個挑戰。
同阿峰言談之下膽粗粗決定試下，略露自己淺見寡識，帶你地聽下平時我喺自己房聽嘅歌，帶你地入keyboy’s room。
強勁班底
我第一首聽嘅林宥嘉歌，同好多人一樣，係《說謊》。嗰時我小四，基本上我阿哥聽咩我就聽咩，所以之後都冇特別留意林宥嘉；朋友講林宥嘉，基本上就淨係識呢首。
再聽林宥嘉，係中四；嗰陣Yoga出左佢第五隻國語大碟《今日營業中》，製作班底多左幾個熟悉嘅名，幾個大家喺香港成日聽到嘅名：
作詞黃偉文Wyman，為大碟寫《壞與更壞》同《天真有邪》，後者歌名更加係Wyman封存左三年嘅idea。而今次嘅主角《壞與更壞》係林宥嘉第一首廣東歌，咁第一次，梗係要搵個殿堂級㗎啦。
作曲林家謙，由幕後作曲走到幕前唱歌，再喺Chill Club推介榜年度推介20/21頒獎禮掃獎，但原來當初同林宥嘉嘅合作係因為Facebook inbox。曾幾何時，呢位叱咤樂壇生力軍金獎人馬喺Facebook send左自己嘅demo比林宥嘉，點知即日收到林宥嘉回覆話揀中左一首。睇嚟我都要IG direct下啲歌手啦。
林宥嘉機緣巧合下認識監製Eric Kwok，並將一直想錄廣東歌嘅心願交託比佢。最估唔到嘅係，Eric Kwok搵左陳奕迅監Yoga嘅vocal。所以當初聽到林宥嘉唱廣東話，當場都嚇一跳。
原來落敗百次 也不可黑變紅
我以前聽歌從來都唔理歌詞。又或者咁講，中四嘅我，屁孩一個，就算用心睇歌詞都冇乜feel。所以我淨係記得頭幾次聽嗰陣，旋律同progression都令我諗起陳奕迅嘅你的背包，尤其是chorus。但近一兩年再聽，再用心咀嚼啲歌詞，就真正愛上首歌。大個左啲，遇到嘅壞事多左，同時陪你共度壞事嘅人少左。以前成日諗，壞事之後一定會有好事出現，某程度上係運氣主宰。換句話說，當你今日碌IG時見到單壞消息，你潛意識都會期待聽日碌IG時會有翻單好消息。但如果，好消息冇再嚟呢？
別乾等 美麗的新世界
呢兩年，發覺原來壞過後，真係可能只有更壞。打開IG，今日單野隨時仲衰過琴日。我們逐漸習慣了荒謬，不知不覺沈溺於失望。但同時學到嘅係，當現實只有「壞」與「更壞」，尋找「好」變得更加重要。這個「好」，就如處於山洞，黑暗環繞自身，縫隙間滲透嘅光線。而我地，就係要學識望實嗰少少僅餘嗰光。未必需要奢望有一日光線會穿過洞穴，但一直盯著黑暗係唔會有任何得著。
呢首歌，提醒我自己，頹夠啦。坐喺屋企日日抱怨過去嘅經歷，其實停滯嘅係自己；世界唔會因為咁而停。凡事都很壞，仍能愉快，才是崇高境界。
==============================
作曲：林家謙
作詞：黃偉文
編曲：張子堅
監制：Eric Kwok
配唱製作人：Erick Kowk、陳奕迅
==============================
Instagram： https://www.instagram.com/lokjustinchan/
Youtube： https://www.youtube.com/c/keyboy1225
==============================